बहरातला.पाऊस

Gayatri S Muley
ऐन बहरात होता
पाऊस तेंव्हा बाहेरचा आतला

कुणास नव्हता अदमास
 त्याचा जराही कोंडलेला

उरात होत्या सरी
 कधीच्या खोल खोल दाटलेल्या
भरात होता जोर कधीचा
 पाऊस मन मेघातला

झरून जाता , धुळीत थोडा
अलवार सडा सांडला
उघडून गेला बंद मनाच्या
 कोपर्यातील खिडकीला

गजात होता जंग जरासा
जुनाच कधीचा चढलेला
पाऊस माझाच होता का
माझ्या तळव्यात साचलेला

थेंब थेंब नक्षी जमावी
 गिरवत काही जुनेच तरी
काय साचले ते तळाशी
ओझे ज्याचे पापणीला

भिजवून गेला चिंब तरीही
डोह कोरडा का उरला
बरसून माझा पाऊस तरी
आज का न बरसला

.पाऊस होता सोबतीला
देऊन गेलास तू कुशीतला
कुठे लपवू आज कळेना
 सर्द ओलावा हा उशीतला

गायत्री....
June 122015